Rudy Soedjarwo സംവിധാനം ചെയ്ത് Dian Sastrowardoyo, Nicholas Saputra, Titi Kamal, Ladya Cheryl തുടങ്ങിയവര്‍ പ്രധാനവേഷങ്ങളില്‍ എത്തിയ ഇന്തോനേഷ്യന്‍ ചിത്രമായിരുന്നു Ada Apa Dengan Cinta?. റൊമാന്റിക്‌ കോമഡി വിഭാഗത്തില്‍ പെടുത്താവുന്ന ചിത്രം വലിയ വിജയം നേടുകയും നിരൂപകശ്രദ്ധപിടിച്ചുപറ്റുകയും ചെയ്ത ഒന്നായിരുന്നു.
സ്കൂളില്‍ തന്റെ കൂട്ടുകാരികള്‍ക്കൊപ്പം സന്തോഷകരമായ വിദ്യാര്‍ഥിജീവിതം നയിക്കുന്ന കൗമാരക്കാരിയാണ് ചിന്ത. പഠനത്തിലും കലാപരമായ കാര്യങ്ങളിലും ഒരുപോലെ മിടുക്കിയായ ചിന്തയാണ് ഒട്ടെല്ലാവര്‍ഷങ്ങളിലും സ്കൂള്‍ നടത്തുന്ന കവിതാരചനാമത്സരത്തില്‍ ഒന്നാം സമ്മാനം കരസ്ഥമാക്കാറുള്ളത്. എന്നാല്‍ ഇത്തവണത്തെ കവിതാരചനാമത്സരത്തില്‍ എല്ലാവരെയും ഞെട്ടിച്ചുകൊണ്ട് രംഗ എന്ന വിദ്യാര്‍ഥി ഒന്നാം സമ്മാനം നേടുന്നു. ഇക്കാര്യമറിഞ്ഞ് ചിന്തയും കൂട്ടരും പകച്ചുപോവുന്നുണ്ടെങ്കിലും സ്കൂള്‍ മാസികയ്ക്കുവേണ്ടി ചിന്ത രംഗയുടെ അഭിമുഖം എടുക്കാന്‍ പോവുന്നു. എന്നാല്‍ രംഗ അഭിമുഖം നല്‍കാന്‍ താല്പര്യം കാണിക്കുന്നില്ല. അങ്ങനെ പരസ്പരം ഉടക്കുന്ന അവര് പിന്നീട് സാധാരണ സിനിമകളിലെപ്പോലെ അടുക്കുകയും മറ്റും ചെയ്യുന്നു. പിന്നീട് നടക്കുന്ന സംഭവങ്ങളാണ് ചിത്രത്തിന്റെ ഇതിവൃത്തം.
കഥാപരമായി വലിയ പുതുമയൊന്നും ഇല്ലെങ്കിലും നടീനടന്മാരുടെ വളരെ സ്വാഭാവികമായ പ്രകടനങ്ങള്‍ കാരണം പ്രേക്ഷകന് ഒരു സിനിമകാണുകയാനെന്ന അനുഭവംപോലും ഈ ചിത്രം നല്‍കുന്നില്ല, പകരം യഥാര്‍ത്ഥജീവിതത്തില്‍ നടക്കുന്ന കാര്യങ്ങള്‍ കാണുന്നപോലെ ഈ ചിത്രം കാണാന്‍ സാധിക്കും. ഒട്ടും pretentious അല്ലാത്ത അവതരണശൈലിയും സ്വാഭാവികമായ സംഭാഷണങ്ങളും മൂലം ചിത്രം കൂടുതല്‍ ആസ്വാദ്യകരമാവുന്നു. ക്ലൈമാക്സ് ചിത്രത്തിന്റെ അതുവരെയുള്ള നിലവാരത്തിലേക്ക് ഉയര്‍ന്നുവോ എന്നകാര്യം സംശയമാണെങ്കിലും പ്രേക്ഷകനെ നിരാശപ്പെടുത്തില്ല. വളരെ മനോഹരമായ കുറേ കവിതാശകലങ്ങള്‍ അവിടിവിടായി ഉള്‍പ്പെടുത്തിയതും ചിത്രത്തിന്റെ മാറ്റുകൂട്ടി.
റൊമാന്റിക്‌ കോമഡികള്‍ ഇഷ്ടപ്പെടുന്നവര്‍ക്ക് ഒരു പുഞ്ചിരിയോടെ ഇരുന്ന് കാണാവുന്ന ഒരു ചിത്രമാണ് ഇത്. കാണാന്‍ ശ്രമിക്കുക.
